Extrait de Fleûrs di m' Bouquèt, Melreux, 1956
Doûce sov'nance
AIR : Les Sapins
I
Pitit viyèdje qui s'mosteûre èl valêye,
Dji t'inme todi tot parèy' qu'è m'djône timps ;
C'èst d'vins tès prés qu'on d'hoûve ad'lez l'havêye,
Qui dj'rèscontra l'Amoûr, on djoû d'prétimps.
C'èsteût st-à l'adje qui l'vèye tchante l'èspérince
Qwand tot sorèy', qui tôt djâse di boneûr ;
Ureûs moumints qui tofér on s'rapinse
Et qui l'passé fait flouwi come ine fleûr !
RESPLEU
Dj'a l'coûr al fièsse
Qwand dj'vins r'trover
L'andrwèt si bê wice qu'ont viké
Mi mère èt m'binamêye maîtrèsse :
Dji r'veûs l'timps di m'djônèsse
Et lès cis qu'dj'a st-inmé !
II
Vor'là l'buskèdje, doûs tèmon d'mès hantrèyes,
I k'noh' lès s'crèts d'mès prumîrès-amoûrs ;
C'èst d'zos cès-âbes, qu'avou m'crapaûte Marèye,
Nos djurîs tant dè loyî nos deûs coûrs...
Divant mès-oûy's, l'îmâdje di c'nozêye andje
Est co vikante come â bon timps passé ;
Fleûrs di djônèsse, sèrmints, tot-à-fait candje,
Mins l'doûce sov'nance ni s'pout mây' èfacer.
III
Ad'lez l'molin, c'èst là nosse vèye dimeûre,
On p'tit rèw' passe à sès pîds tot tchantant :
Oh ! dj'èl rik'noh' è s'bê câde di vèrdeûre,
Inte lès peûrîs qui sont floris tot blancs.
Tot come d'avance, lès claw'sons, lès violètes,
Y marièt co leûs riyantès coleûrs
Et l'oûhê r'vint tchanter so s'glôriyète,
Mins mès parints n'sont pus là d'vins sès meûrs !
Commentaires