Extrait de Fleûrs di m' Bouquèt, Melreux, 1956
Li martchand d'pourçias
(dialecte Hesbignon)
(Musique de l'auteur)
L'artisse a mètou on long sâro èt dès guêtes ; il a on gros vinte ; i tint on mèsplî è s'main èt fait rôler lès R po djâser.
I
Dji sos k'nochu d'tot l'viyadje,
Minme vê-là d'vins l's-invirons
Et tot l'monde djoupe su m'passadje :
« Ie i môrdiène, volà Simon ! »
Dji prominne avâ l'Hèsbaye
Mi longue surale èt m'nâlî ;
E tot timps, c'èst haye-da-daye
Su lès fôres èt lès martchîs !
RESPLEU
Ah ! volà l'martchand d'pourçias !
Volà l'martchand d'pourçias !
Djoupe-t-on ous' qui dj'vas ;
C'èst co t'minme qu'ès là !
Ah ! volà l'martchand d'pourçias !
Volà l'martchand d'pourçias !
II
Po martchoter d'vins lès bièsses,
Crèyoz-m', i fât-èsse sûtî :
Là-d'vins, vos n'gagn'roz pont d'pèces
Si vos n'savoz nin minti.
I s'fât vanter d'èsse brâvè ome,
Rîre avou Flupe ou Tonton ;
S'on goure minme onk po 'ne boune some,
Fât co s'plainde d'èsse li dindon !
RESPLEU
Ah ! volà l'martchand d'pourçias !
Volà l'martchand d'pourçias !
Po ramasser d'ça,
I tromp'reût s'papa...
Ah ! volà l'martchand d'pourçias !
Volà l'martchand d'pourçias !
III
A fwace qui dj'avale dès pintes,
Li boune air èt l'bon bokè,
On m'djoupe dè vèy' gonfler m'vinte :
Ti t'ècrâhe pire qu'on cossèt !
Po ça dj'passe ine fwârt bêle vîye,
Pusqui dj'na qu'à voyadjî
Et dj'atrape co traze bètchîyes
As fièsses qui s'fèt sul payîs !
RESPLEU
Ah ! volà l'martchand d'pourçias !
Volà l'martchand d'pourçias !
C'ès't-on galapia
Qui n'tûse qu'à s'boya...
Ah ! volà l'martchand d'pourçias !
Volà l'martchand d'pourçias !
IV
Tot moussant d'vins lès monjones,
Dji tombe à d'bounes-ocâsions :
Co traze fîyes dji n'troûve persone
Qui l'comére po m'rinde raison.
Dji v'lî chipe ine pitite bâche,
Tôt z-alant wêtî l'pourçia ;
E stâ, dji sos bin à l' âche
Et persone ni veût rin d'ça !
RESPLEU
Ah ! volà l'martchand d'pourçias !
Volà l'martchand d'pourçias !
C'èst l'mèstî l'pus bia,
Por mi, n'a nin mia !
Ah ! volà l'martchand d'pourçias !
Volà l'martchand d'pourçias !
Commentaires