Extrait de Fleûrs di m' Bouquèt, Melreux, 1956
Li Gard-Champète
Air : Les Pioupious d'Auvergne
Rèspleû
R'a rin d' pus bê qui l' posse di gârd-champète,
Qwand-on a l' mwèyin
Di s' fé r'crainde dès djins.
Mins fât minti, saveur bin fé l' robète
Et s'saveûr ployî
Wice qu'on n' pout nin roter drèssî.
I
Dji sos gârd-champète
Et dji m' pous vanter
D'èsse li pus adrète
Qu'on sâreût trover.
I fâreût vèy' come
Dji sès fé l' malin,
Po qu'ine dringuèle tome
Chal èl pâme di m' main.
II
E mi p'tit viyèdje,
C'èst ci-chal qu'est tot
N'a nouk po l'veûyèdje
Come mi d'zos l' solo
Mins, d'vant n' boûse â lâdje,
Dji roûvèye li lwè :
Vite, dji hèye li pâdje
Et dj' broûle li procès.
III
Qwand i n'a n' bataye
Et qu'n'a dè dandjî
Dè ramasser m' daye,
Dj'èl zè lais s'plinkî.
Adon, qwand l' bagâre
Est r'freûdèye assez,
Come on vint dji dâre
Vèy' çou qu' s'a passé.
IV
Qwand dji veûs n'êrcule
Qui s' kitape on pô,
Dji passe so 'ne mâcule
Sogne dè r'çûr on côp.
Mins si c'èst st-on mwinde,
Adon, dj' fais mi d'vwèr
Et s'i s' vout disfinde
Dj'èl kiheûs tot mwèrt.
V
Tél'mint qu' dji promète
A Piére ou Colas,
Dj'atrape ine robète
Ou 'ne poye chal ou là.
Ainsi, nosse marmite
Tchante sovint so l' feû
Et l'air qu'èle dibite
Rind m' manèdje djoyeûs!
Commentaires