Extrait de Fleûrs di m' Bouquèt, Melreux, 1956
A mes cuzènes Hélène et Julia
Li djoû qui dj'fas mès Pâques
Air : Sur le seuil de ta porte
I
Dji vins di m'rapinser
Dès doûs moumints passés
Di v'là dèdjà bin dès-ânnèyes,
Tot loukant lès pâquês (1)
Règuèdés, l'air ètê,
Dj'à r'viké dès djôyes rèvolêyes :
Dji m'a r'vèyou tot p'tit,
Ritche d'èspwèr è l'av'ni,
Pinsant qu' jamây' l'aweûre ni lâke
Et, dispôy' on moumint,
Dji m'dis : qui n' sos-dje co bin,
Li djoû qui dj'fas mès pâques !
II
Awè, dji m'riveûs co
Plein d'bês sondjes èt come sot
Hâtin de s'trumer m'bèle mousseûre
Et, d'èsse fîr dè hâgner
Li monte qu'on m'aveût d'né,
Dji n'féve qui d'loukî tot l'timps l'eûre ;
I m' soulève qui dj'èsteûs
Pus-ome èt pus moncheû,
Dji m' sintéve candjî par mirâke
Mins m'plaisîr dura pô,
Ga dji r'grèta so l'côp
Li djoû qui dj'fas mès pâques !
III
Dji fas l'toûr dès wèzins,
Po mostrer mes mouss'mints
Et m'fé répéter qu' dj'èsteûs gâye ;
Tot l'parintèdje èsteût
Rapoûlé d'zos nosse teût,
Ci fout l'pus clapante flèsse qu'i n'âye.
Mi por-manôye s'infla
Et, d'vèy' l'acoûte qu'on m'fat,
Dji n' sèpéve s'on n' nouméve co Djâcques
Qwand vola m'pére qui m' dit :
« T'irès st' ovrer come mi,
Pusqui t'as fait tès pâques ! »
IV
Lès-annêyes si d'hombrèt
D'èpwèrter djôyes èt r'grèts
Divins lès fonçês dèl roûviance
Mins dj'a wârdé l'sov'nîr
Fris' come s'il èsteût d'îr
Di c'bê djoû-là di m' tinre èfance...
Doûce sov'nance d'on passé
Qui m'a n'fèy' èssincé
De vrêy' boneûr qui d'pôy' mi mâque.
Ossu, dj'veûrè r'glati
Tote mi vèye è mi èsprit
Li djoû qui dj'fas mès pàques !
(1) Pâques = premiers communiants.
Commentaires