Extrait de Fleûrs di m' Bouquèt, Melreux, 1956
Dispôy' qui dj'sos Consèlier
I
Divant qui dj' intrasse â Consèy',
Dji d'véve gangnî m' crosse a l'ovreû :
Oûy', dji passe ine awoureûse vèye :
Dji vike sins ponne èt so blanc peû.
Dji vins dè ragrandi m'botique
Di cigâres, di stofes èt d'solés :
Dji creûs qu'on m'atchèsse lès pratiques
Dispôy' qui dji sos consèlier !
II
Vos n'creûrîz mây' tot çou qu' dj'atrape
Di cadôs corne di picayons ;
Mi vwès, n'a dès fèy's qu'on s'èl hape
Al haûsse, tot come al vindicion.
Po l'rawète, on m'houke a 'ne swèrêye
Po m' rimèrci qwand dj'a vôté ;
Dji sès çou qu' c'èst qu'ine bone eûrêye,
Dispôy' qui dji sos consèlier !
III
Qwand dji m' pormonne avâ l'comeune,
Dji sos r'ioukî dès gros mècheûs ;
Lès trotwérs, lès vôyes, c'èst d'à meune
Tèl'mint qu'i m' sonle qui dj'a dès dreûts.
Dj'ireûs sol tram rin qu' po fé vèy'
Qui dji n' pâye nin come mes confrés,
Dj'a si bon d' fé pwèrter m' vèssèye
Dispôy' qui dji sos consèlier !
IV
Qwand dj'ovréve, dj'aveûs mons d'prèsteûre
Ca dj'èsteûs pus mêgue qu'on hêron,
Oûy', dji n'a pus nole bone mousseûre
A câse qui dj'sos div'nou tot rond.
Il èst pus d'ût-eûres qwand dji m'iîve
Et dj'fais co m'prandjîre â dîner,
Dji sos bin rècrâhî d'trintes lîves,
Dispôy' qui dji sos consèlier !
V
Mi fèye èt m'feume sont bin pus fîres
De vèy' qui dj'sos div'nou 'ne saqwè.
Zèles, qui n' sèpèt ni lère ni scrîre,
Sont toumêyes so l'bosse dè francès.
S'èle li k'hatchèt tot l'long dèl vôye,
Dji n'a nin l'dreût dèl-zè blâmer :
Mi, dji fais bin l'robète di crôye
Dispôy' qui dji sos consèlier !
VI
A consèy', po n' nin qu' dji m' fordjâse,
Dji n'risquêye nin l'pus p'tit discoûrs ;
Pus vite qui dè bâte ine mâle câse,
Dji hosse mi tièsse qwand c'ès't-à m'toûr,
Dji tchante amen à totes lès messes
Et dj'aspôye li ci qu'sét bracler ;
I m' sonle qui dj'n'a pus l'air si bièsse
Dispôy' qui dji sos consèlier !
VII
L'électeûr ès't-on bon-apôte
Qu'on-andoûlêye tot djâsant bê ;
Al flater so l'trèvins qu'on r'vôte,
I pardone lès mâcules qu'on fait.
S'on s'riwine minme a li promète,
On s'ratrape tofér â n'rin d'ner...
Via k'mint qu'on djowe âs marionetes
Amon Mècheûs lès Consèliers!..
Commentaires