Extrait de Fleûrs di m' Bouquèt, Melreux, 1956
Li Boneûr a dès éles
AIR : L'homme et son chien
I
Piére, è s'prumîre djônesse, si mètéve è l'îdèye
Qui l'ome èsteût so l'tére po n'goster qu'tote doûceûr ;
Sès binâmés parints l'inmît co pus qu' leû vèye
Et wèstît foû di s'vôye lès caweyês dè mâleûr.
I lès pièrda tôt djône èt s'deûr candj'mint d'vikèdje
Lî mostra qu'n'a dès roses, mins bin dès s'pènes ossi...
Li boneûr a dès éles, c'èst-in' oûhê d' passèdje :
I s'èvole foû d'nos mains, qwand nos pinsans l'tini.
II
Piére kwèra s'dèstinêye èl vôye di l'èspèrince
Enondé d'sès vint ans, di sès sondjes lès pus bleûs,
I rèscontra l'Amour qu'andoûla s'confiyince,
Tot catchant lès displis qu'on rascôye à sès djeûs.
Si coûr si lèya prinde d'ine bêle â fâs visèdje
Qu'ènn'è fat st-ine djodjowe pwis qu' lî rinda moudri...
Li boneûr a dès éles, c'ès't-in' oûhês d'passèdje :
I s'èvole foû d'nos mains, qwand nos pinsans l'tini.
III
Li timps sôda s'blèsseûre, i s'rifa st-ine aûte vèye :
L'Amour, pus djènèreus, li d'na 'n'feume qui l'inma,
Après deûs-ans d'marièdje, il ava n' nozêye fèye
Qui fout l'djôye di s'mohone, l'espwèr èt l'rafiya.
Mins qwand-èle ava l'adje qui l'coûr kwîre li bâhèdje,
C'èst tot l'dizonorant qu'èlle aband'na l'doûs nid...
Li boneûr a dès éles, c'ès't-in' oûhê d'passèdje ; ",
I s'èvole foû d'nos mains, qwand nos pinsans l'tini.
IV
L'arîre sâhon di s'vèye si k'hiya sins-akseûre :
I vèya disparète lès brouheûres dè passé
L'awoureûs'té sonléve riprinde djîse è s'dimeûre
Qwand s'paûve feume rinda l'âme èt l'ièya tot d'sseûlé.
Asteûre, Piére èst halcrosse po porsûre si voyèdje,
I n'veût pus nol èspwér è l'av'nîr èneûri...
Li boneûr a dès éles, c'ès't-in' oûhê d'passèdje :
I s'èvole foû d'nos mains, qwand nos pinsans l'tini.
Commentaires