Extrait de Fleûrs di m' Bouquèt, Melreux, 1956
Les deûs pomes
On père rapwèrta 'ne fèy' deûs pomes
A sès-èfants : Jules èt Gèrome ;
A ponne èl z-aveût-i mostré,
Qui li p'tit Jules aveût dâré
So 'ne bêle rodje èt r'lûhante
Qui s' mostréve fwért apétihante.
Gèrome, qu'èsteût st-on bon valèt,
Ni r'clama nin po si pô d' tchwè...
- « Ahâ ! fat l'aûte, avou 'ne air di baltèdje,
Come on dit bin sovint
Qui c'èst l' dièrin
Qu'a l' mèyeû harin,
Prindez l' crotêye qui v' dimeûre è pârtèdje ! »
Volà nos deûs gamins qui s' mètèt st-à crohî
E prézince di leû père qu'aveût bon d' lès bwèrgnî...
Li bêle rodje pome èsteût tél'mint deûre et surisse
Qui li p'tit pansâ d' Jules èl tapa so l' cindrisse
A tot fant 'ne hègne dissus !...
L'aûte frûtèdje. sins parâde, èsteût tinre et plein d' dju
A fé v'ni l'êwe al boke...
Vèyant s' fré
Si ragoster
Come s'i magnîve ine troke,
Jules dèrit st-à s' père qui riyév' dispôy' ine tchoke :
- « Poqwè ni m' dihîz-v' nin qui dj'aveûs ma tchûsi?... »
- « Poqwè ?... r'prinda noste ome ; po deûs motifs, mi fi :
Prûmir'mint po puni
Vosse pitit coûr et vosse grande goûrmandise ;
Deûzinm'mint po qu' vos-aprindîze
Qui nosse vèye èst pleinte di surprises!...
N'a tant come vos qu' djudjèt li valeûr sol bêté,
Sins loukî si l'â-d'vins catche on pô dèl bonté !
Sov'nez-v', mès chérs èfants, dèl leçon dès deûs pomes :
Ele vis vinrè st-à pont po qwand v' serez dès-omes !
Commentaires