Extrait de Fleûrs di m' Bouquèt, Melreux, 1956
Li Sincî èt l'Pîmâye
Tot-al copète d'on gros peûrî,
E fond dè djârdin d'on sincî,
On pîmâye dibitéve lès pièles
Di sès plaîhantès ritoûrnèles.
D'ètinde dès-ossi bès rèspleûs,
Volà l'sincî qu'acoûrt tot dreût.
Noste ome, sol côp, nn'ava st-invèye,
Ca, qwand l'tchanson fourit finèye,
I s'aprèpia doûc'mint d'l'oûhê
Et lî d'ha : « Vos qu'ès sins ratrê,
Qui sofrihe li mitan d'I'annêye,
Dèl bîhe, dèl nivaye, dèl djalêye
Et qu'èst sovint k'tchèssî dèl faim,
Lèyîz-v' prinde, dji v'promète d'èsse bin,
D'avu d'tot sorlon vosse manîre !
Vos-irez divins 'ne grande volîre
Qu'èst vrêy'mint çou qu'i n'a d'pus bê,
Vos dirîz vèy' on p'tit tchèstê !
Adon, vos n'ârez pus famène,
Dji v'donrè dès viérs di farène,
Dè souke ; tot çou qui v'sonl'rè bon
Sèrè st-à vosse dispôsicion ! »
- « Ah ! nèni, rèsponda l'pîmâye,
Çoula, dji n'l'ak'cèpt'rè jamây' ;
Vos m'volez prinde çou qu'n'a d'mèyeû,
Çou qu'rind l'oûhê l'pus-awoureûs,
Li pus grande di totes mes ritchèsses,
Po m'fé l'pus mâlureûse dès bièsses ;
Nèni, merci, dji vous wârder
Çou qu'tot l'monde inme : li lîbèrté !
Pîmâye : bouvreuil.
Commentaires