Extrait de Fleûrs di m' Bouquèt, Melreux, 1956
Po l'djoû d'Saint-Nicolèye
Qwand Juliète si lèva, li djoû d'Saint-Nicolèye,
Elle ala trover l'tâve qui r'dohîve d'èsse tchèrdjèye
Di totes sôres di bês d'jeûs, di bounames èt d'bonbons,
Et dèl vèy' ritche di djôye, si bone mame aveût bon...
L'èfant bâha s'bèle pope, gosta quéquès bobones
Et r'mèrciha l'grand saint po çou qu'èsteût midone,
Pwis tûsant st-ine miyète, èle prind 'ne bwète di cârton,
I met' dès neûhes, dès djèyes, dès coûkes et dès marons
Et va kwèri s'vîle pope è fond dèl chifoniére...
Adon, d'si p'tite vwès d'andje, dit st-à s'binamêye mère :
- « Volez-v' bin qui dji vâye pwèrter cès-afaires-là
Chal à li p'tite wèzène, à m'camarâde Anna ?
Elle èst si paûve, dè, mame! èt s'papa dwème è l'ête...
Ir al nut', èle ploréve et s'mame èsteût disfaite
Pace qui Saint-Nicolèye ni vinreût nin ç'côp-chal.
Mi, d'jârè co tant d'djeus si dj'lî pwète minme çou-chal. »
- Alez, mi chère èfant, fat l'mére, tôt bâhant s'fèye,
Et s'fé sovint dès keûres come cisse-lal è vosse vèyë ! »
Commentaires