Extrait de Fleûrs di m' Bouquèt, Melreux, 1956
Li préfèrince
Treûs bâcèles, èl coûr di li s'cole,
Djâsît st-èssonle di leû parints
Et l'dame, tôt fant lès kwances di rin,
Prustéve l'orèye à leûs paroles.
- « Lisquék inmez-v' li mis - dihéve li p'tite Rôsa
A sès deûs camarades - vosse mame ou vosse papa ? »
Après-aveûr tûsé 'ne miyète,
Vochal çou qu'rèsponda Mariète :
- « C'èst m'papa qu'dji veûs l'pus voltî,
Pace qu'i m'rapwète dès djeûs, dès tchiques,
Dismètant qu'èl plèce di m'fièstî,
Mi mame mi done co bin dèl trique. »
- « Mi ! c'èst l'contraire. fat Jane, c'èst m'mame qu'a tot mi-amoûr
Pace qui dj'a çou qu'dji vous foû d'ièye :
Dè chocolat, dès glotin'rèyes ;
Ele veût si vite qwand dji djêrèye !
Mins m'papa n'a nin si bon coûr :
I m'noume co bin trésor, binamêye andje,
Et qwand dj'lî mâque, n'a l'timps qui candje :
Al vole li martinet lî prustêye si concoûrs ! »
- « Eh bin, r'prinda Rôsa, vos-èstez deûs ingrâtes :
Vos n'kinohez vrêy'mint qui l'ci qu'i v'gâte ;
Voste amitié n'va nin pus Ion
Qu'ad'lé l'ci qui v'done dès bonbons.
Mins mi, dj'èl va dire come dj'èl pinse :
Dji n'a nole préfèrince !
Mi mame come mi papa, c'èst por mi qu'il ovrèt
Et po çoula, tofér, onk come l'aûte dj'èl z-inm'rè ! »
- « A la bone eûre, Rôsa, fat l'dame !
C'est très bien !
N'a qu'vosse rèsponse qui seûy' d'adrame
Et po çoula, vos-ârez st-on bon point ! »
Commentaires