Extrait de Fleûrs di m' Bouquèt, Melreux, 1956
Nùt' di djulèt'
Li nut' èst d'hindowe so l'viyèdje...
Li doûs vint, qu's'èlîve foû dès tchamps,
N'a nin l'fwèce de r'mouwer l'fouyèdje
Là wice qu'on n'ètind pus nou tchant.
Li cîr est ticté d'mèye siteûles
Et l'leune qui vint loukî drî l'hé
Trawe, dèl nutêye, lès grîsès teûles
Tot-z-ârdjintant lès bwès, lès prés.
Podrî lès djârdins flote l'èssince
Dè foûr côpé qu'inbaûme lès-airs ;
Li bièrdjî, conte li meûr dèl since,
So s'huflèt, djowe ine dièrinne air.
So l'basse, on brouliârd di foumîre
Monte dizeû lès rînnes qui brèyèt ;
Li brak'neû gangne li sapinîre
Et s'èfonce è mistére dè bwès.
A Ion, l'convwè qu'frich'têye so l'ray'
Monne on brut qu's'èmonte èt distind,
Puis qui s'rèlîve come li r'mowemint
D'on fwért vint qui k'heûreût l'ramaye.
Là d'zos, wice qui tchante on sûrdon,
On râskignoû so s'flûte l'ak'pagne...
Et l'coucou qu'amousse èl campagne,
Mahe avou zèls si vîle tchanson !
Commentaires