Extrait de Fleûrs di m' Bouquèt, Melreux, 1956
Li Clérisse
E buskèdje, i n'a st-on clérisse*
Wice qu'i fait tot vért et tôt bleû ;
C'èst là qui lès copes, âs bês meûs,
Vont houmer l'airèdje peûre et frisse.
Foû dès mossês doûs come de v'loûrs.
Astîtche li blanke tièsse dèl patrôse**
Et d'zeû l'vèvî, li sâvadje rôse
Sonle hoûter l'grusinèdje d'amoûr
Qui s'èlîve adlé lèye, puis qu'moûrt
Tot montant vès l'cîr d'on clér rôse.
Lès fâbîtes èscolèt,
D'èstant so l'cohète,
Leûs p'tits nids qui tchantèt
Divins leûs catchètes.
L'èreûre sème dès pièles so l'bohèye
Et so l'mossê ;
Chaque foye, chaque fleûr èst ramouyèye,
Qwand li djoû s'fait...
Li sprèw' qui s'dispiète è s'niyêye
Sitind s'tièsse foû
Et houme li clére gote di rosêye
Qui pind d'zeû s'soû.
Qwand, drî l'hé, l'leune
Vint trawer l'breune,
E p'tit vèvî ll'va s'èfoncer
Parèye qu'on balon ârdjinté.
Divins 'ne fontinne
Clére come on r'djèt,
Avou l'cîr si murèt
Dès miosotis par cintinne.
Atoû d'cès frissès fleûrs,
S'èlîve on doûs tchant d'chœûr :
Li wasse
Fait l'basse
Et l'malton
L'bariton.
Li vwès d'èl mohe
Sone clér come l'ôr ;
C'èst lèye qu'on k'nohe
Po fé l'ténôr...
Et Pmohète, lèye,
A co s'pârtèye :
On ôd s'sôlô
Fwért piânô...
On fâwe qu'a vèyou cint meûs d'may'
Est là drèssî ;
Cint-iviérs ont d'moussî s'ramaye,
Sins l'fé ployî...
Sès brès' èwalpés d'vérts fouyèdjes,
Hossèt dès nids-,
L'Amoûr va d'zos sès spès-ombrèdjes
Po s'rèdjouwi.
El friskâde dè clérisse, tot rèy' èt tchante ;
Li fleûr èssince, hâgne si riyante coleûr...
Et tot quî mousse è s'cwène di tére qu'èstchante,
Fait dès sondjes d'amoûr èt d'boneûr !
* Clerisse = clairière.
** Murguèt ou patrôse = muguet.
Commentaires