Extrait de Fleûrs di m' Bouquèt, Melreux, 1956
Sèrèg
I
Sèrèg, payîs dèl hoye, di l'acir èt de vêre,
Planté d'hautès tchèteûtes qu'ont l'air d'èsprinde li cîr,
Andrwèt rimpli d'comèrces, qui r'mowe on monde d'afaires
Avou sès-industrèyres qu'on r'nome à l'ètrindjir.
Vigreûs Sèrèg
Tére d'agrè
Dji t'inm'rè
Tant qu' dji vikrè !
II
Flouhe di djins qui s' rimowe corne on niyâ d' frumihes
E brut d'fèrayes et d' tôles qui f'ôrmet co traze sons,
Cité qui r'dohe èt qu' tronle à chok qui l'èstoûrdih
El tènisse bardouh'rèye dès mârtês dès pilons,
Vigreûs Sèrèg, etc.
III
Peûpe sincère al franke djêve qu'a lès tch'vèts près dèl tièsse
Qui s'èstchâfe po 'ne tchîtchêye èt qui r'freûdihe po rin,
On t' troûve tofèr â posse qwand s'adjih d'on bê djèsse
Et t'as tél'mint bon cour qu'on roûvèye tes mèhins.
Vigreûs Sèrèg, etc.
IV
Bone sincieûse cwène di tère, t'as co traze sôres di s'coles,
Là wice qui tès-èfants vont kwèri l'vôye d'av'nir ;
T'as 'ne plèce ossu po l'ârt, po c'fleûr come i n'a nole
Po-z-èssincer l'esprit di boneûr et d' plaisir !
Vigreûs Sèrèg, etc.
V
Comeune qu'a fait sûrdi saqwantès bèlès-oûves.
Principâl'mint l'ospice po lès vis mâleureûs
Et l'grand-ôrphelinat wice qui l'ôfulin trouve
On doûs ratrait qu' l'oblidje à roûvî qu' l'èst tot seû !
Vigreûs Sèrèg, etc.
VI
Rivante contrêye dès C'mones avou t'bwès dèl Vèquêye,
Qu'a vrêy'mint l'air d'èsse là po ranairî ses djins,
T'ès leû-z-Esneux qu' lès r'tape qwand il ont fait djoûrnêye
To l's-î drovant lès vôyes dè pus hêti djârdin.
Vigreûs Sèrèg, etc.
VII
Vikante locâlité qui r'présinte li corèdje
Avou l'masse di fabriques èt tès fosses â tchèrbon,
Divins tès meûrs plins d'vèye, ci n'est qu'on tchant d'ovrèdje
Qui s'èlive avou glwère po tès-ovrîs di r' nom !
Vigreûs Sèrèg, etc.
Commentaires