Extrait de Fleûrs di m' Bouquèt, Melreux, 1956
Adiè à l'adje doré
Qwand mes saze ans d'cloyît so l'bwérd di l'adje flori,
Mi coûr, d'on côp, s'drovia come ine rôse à l'êreûre
Et l'Amour à l'awête, qui kwèréve avinteûre,
S'î v'na lodjî sins djinne èt çoula sins moti.
Adon, tot-èstchanté, hossî d'ine douce aweûre,
Ine saqwè m'assètcha sovint drî quéque corti,
Ou d'vins dès cwènes tchûsèyes wice qui dj'aléve kwèri
Li doûce carèsse d'ine blonde ou l'rislèt d'ine bèle neûre!..
O djoûs trèssîs d'boneûr ! vos passez d'zeû nosse front
Come l'arondje, è s'volêye, raze lès fleûrs de wazon,
Ca l'adje doré m'sonla tot court come on djoû d'fièsse...
Et d'vèy' cori m'djône timps vès l'soû di l'adje maweûr,
Dji m'dihéve, sospirant, qwand 'ne annêye aléve heûr :
« Vola co 'ne rôse flouwèye è djârdin di m'djônèsse ! »
Commentaires